Sveitir JR fögnuðu sigri í bæði karla- og kvennaflokki í sveitakeppni Júdósambands Íslands í Laugardalshöllinni í gær.
Alls tóku sex sveitir þátt í karlaflokki og tvær í kvennaflokki. Í sveitakeppninni eru allt að fimm keppendur í hverri sveit, í mismunandi þyngdarflokkum, og var keppnin jöfn og spennandi. Það voru sveitir JR og Draupnis sem kepptu til úrslita báðum flokkum. Í kvennaflokki vann reynslumikil sveit JR nokkuð öruggan sigur á ungu og efnilegu liði Draupnis, með fjórum vinningum gegn engum.
Í karlaflokki var spennan hins vegar mikil, en þar vann JR sigur með þremur vinningum gegn tveimur. Sveitir Selfoss og JR-B urðu í þriðja sæti.