Íshokkímennirnir Björn Róbert Sigurðarson og Steindór Ingason, sem hlutu þyngsta mögulega dóm hjá dómstól ÍSÍ vegna ólöglegrar lyfjanotkunar, hafa áfrýjað dómnum til áfrýjunardómstóls ÍSÍ.
Björn Róbert og Steindór voru dæmdir í fjögurra ára keppnisbann frá 6. september á þessu ári, en þeir urðu uppvísir að steranotkun. Lyfjaeftirlit ÍSÍ tók þá í lyfjapróf á æfingu UMFK Esju í haust.
Landsliðsmennirnir tveir játuðu brot sitt skilyrðislaust en fóru fram á sýknu eða til vara vægustu refsingu, meðal annars vegna þess að lyfið hafi verið innbyrt utan æfinga- og keppnistímabils og vegna þess að tilgangur notkunarinnar hafi verið að skera niður líkamsfitu vegna fyrirhugaðrar sólarlandaferðar en ekki til að bæta árangur á vellinum.
Ekki er ljóst hvenær áfrýjunardómstóll tekur málið fyrir en vonast er til þess að niðurstaða liggi fyrir í þessum mánuði.