Ólafía Þórunn Kristinsdóttir, Íslandsmeistari í golfi, verður í ráshópi með Natalie Gulbis þegar hún fær eldskírn sína á bandarísku LPGA-mótaröðinni á Bahamaeyjum.
Þær hefja leik kl. 8.22 að staðartíma á 1. teig á fimmtudaginn eða kl. 13.22 að íslenskum tíma.
Gulbis er bandarísk og hefur verið á mótaröðinni síðan 2002. Gulbis varð fljótt þekkt nafn í golfinu og landaði samningum við ýmis stór vörumerki eins og Adidas. Hún hefur nýtt frægð sína með ýmsum hætti og komið víðar við en á golfvellinum.
Henni hefur þó ekki tekist að sigra á risamóti en hefur verið á meðal tíu efstu á þeim öllum og á meðal fimm efstu á þremur þeirra. Hefur hún þénað rúmlega 500 milljónir íslenskra króna með árangri sínum á mótaröðinni í gegnum árin.
Svo skemmtilega vill til fyrir Ólafíu að Cheyenne Woods er einnig í ráshópnum en hún var samherji Ólafíu í skólaliði Wake Forrest á sínum tíma í bandaríska háskólagolfinu. Hafa þær verið góðar vinkonur síðan þá. Woods er bróðurdóttir Tiger Woods.