Atvinnukylfingurinn Ólafía Þórunn Kristinsdóttir var á meðal efstu kylfinga á öðrum degi á Opna skoska meistaramótinu í North Ayrshire í dag. Hún lék á 70 höggum eða tveimur höggum undir pari. Til samanburðar lék efsta kona mótsins, Cristie Kerr á 73 höggum og Karie Webb sem er í öðru sæti lék á 75 höggum í dag.
Ólafía fór hins vegar ekki vel af stað og fékk skolla á fyrstu tveimur holunum í dag. Hún bætti úr því með að fá tvo fugla og einn örn á næstu sjö holunum og lyfti hún sér verulega upp töfluna og fór hún upp um 30 sæti í dag.
Á síðari níu holunum fékk hún tvo fugla og tvo skolla og er hún samanlagt á einu höggi undir pari á mótinu, fjórum höggum á eftir efstu konu.
Fylgst var með gangi mála í beinni textalýsingu á mbl.is.