Atvinnukylfingurinn Ólafía Þórunn Kristinsdóttir lék á 73 höggum eða einu höggi yfir pari á fyrsta hring sínum á Kia Classic-mótinu í Carlsbad í Kaliforníu í Bandaríkjunum í kvöld.
Hringurinn var nokkuð skrautlegur en hún fékk einn örn, þrjá fugla, fjóra skolla og einn skramba. Hún var á tímabili á meðal 30 efstu kylfinga er hún komst einu höggi undir pari. Þá fór hins vegar að halla undan fæti og féll hún niður listann.
Ólafía leikur annan hringinn sinn á morgun og vonast þá til að komast í gegnum niðurskurðinn, en hún verður að öllum líkindum að spila betur þá en í dag.
Þegar þessi frétt eru skrifuð eru þær Jackie Stoelting frá Bandaríkjunum og Caroline Hedwall frá Svíþjóð efstar á sex höggum undir pari.