Ákveðni skein úr andliti hvers einasta leikmanns Stjörnunnar þegar flautað var til viðureignar liðsins við Gróttu í gærkvöldi. Ekki aðeins hafði sigur liðsins í síðustu viðureign verið úrskurðaður tapaður heldur voru leikmenn liðsins komnir með bakið upp að vegg. Þeir urðu að vinna ef þeir ætluðu ekki að fara í snemmbúið sumarleyfi. Það kom ekki til greina hjá deildarmeisturunum. Þeir voru með tögl og hagldir frá upphafi til enda og unnu afar sanngjarnan sigur, 19:14, eftir að hafa einnig verið fimm mörkum yfir í hálfleik, 12:7.
Stjarnan er þar með komin með einn vinning í rimmunni gegn tveimur hjá Gróttu. Næst leiða liðin saman hesta sína annað kvöld á Seltjarnarnesi.
„Burt séð frá umræðunni þá kom bara ekki til greina að fara í sumarfrí. Við ætlum okkur lengra í þessu móti en að falla úr keppni í undanúrslitum,“ sagði hin leikreynda Hanna Guðrún Stefánsdóttir, leikmaður Stjörnunnar, skömmu eftir að flautað var til leiksloka í gærkvöldi.
Nánar er fjallað um leiki gærkvöldsins í undanúrslitum Olís-deildar kvenna í íþróttablaði Morgunblaðsins sem kom út í morgun.