Fram og Haukar fylgja toppliði Vals enn sem skugginn í Olís-deild kvenna í handknattleik, en í kvöld réðist hvaða lið eru örugg í úrslitakeppnina.
Valur er enn með tveggja marka forskot á toppnum eftir sigur á Stjörnunni, en Haukar og Fram unnu bæði sína leiki og eru tveimur stigum á eftir Valskonum. Tap Stjörnunnar þýðir að liðið kemst ekki á meðal efstu fjögurra heldur er ÍBV öruggt með sæti þar eftir sigur á Selfossi.
Fram heimsótti Gróttu á Seltjarnarnes og vann öruggan 14 marka sigur, 35:21, eftir að hafa haft sjö marka forskot í hálfleik 16:9. Ragnheiður Júlíusdóttir var markahæst hjá Fram með 8 mörk en hjá Gróttu skoraði Lovísa Thompson 7 mörk.
Haukar fengu Fjölni í heimsókn og þar var aldrei spurning hvernig færi því Haukar unnu 21 marks sigur, 39:18. Þórhildur Braga Þórðardóttir var markahæst hjá Haukum með átta mörk en hjá Fjölni skoraði Andrea Jacobsen sex mörk.
Staðan í deildinni þegar þrjár umferðir eru eftir:
Valur 30, Haukar 28, Fram 28, ÍBV 26, Stjarnan 17, Selfoss 7, Grótta 4, Fjölnir 4.