Landsliðsmennirnir Aron Pálmarsson og Bjarki Már Elísson eru komnir til Doha í Katar þar sem þeir taka þátt í heimsmeistaramóti félagsliða í handknattleik með liðum sínum, Barcelona og Füchse Berlin. Mótið hefst á morgun.
Barcelona tekur þátt í heimsmeistaramótinu sem ríkjandi meistari en Börsungar stefna á að vinna heimsmeistaratitil félagsliða í fjórða sinn. Barcelona mætir Al Najma frá Barein í átta liða úrslitum keppninnar en AL Najma vann Meistaradeild Asíu.
Füchse Berlin vann sigur í EHF-keppninni á síðustu leiktíð og tryggði sér þar með farseðilinn til Doha. Bjarki Már og félagar leika við Taubate frá Brasilíu í átta liða úrslitunum en Bjarki hefur tvívegis unnið heimsmeistaratitil félagsliða með þýska liðinu.
Í hinum tveimur leikjunum í átta liða úrslitunum eigast við Evrópumeistarar Montpellier og afrísku meistararnir í L’Association Sportive Hammamet frá Túnis og Al-Sadd frá Katar mætir Eyjaálfumeisturunum í Sydney University frá Ástralíu.
Þetta er níunda árið í röð sem heimsmeistaramót félagsliða er haldið í Doha en lið frá Þýskalandi og Spáni hafa hampað heimsmeistaratitlinum í öll skiptin. Ciudad Real frá Spáni vann mótið 2010 og 2012. Barcelona varð meistari 2013, 2014 og 2017. Kiel vann titilinn 2011 og Füchse Berlin 2015 og 2016.