Karlalið Vals í handbolta mætir Olympiacos frá Grikklandi í úrslitum Evrópubikarsins og fer fyrri leikurinn fram á Hlíðarenda klukkan 17.
Seinni leikurinn verður leikinn í Aþenu eftir viku og má búast við miklum látum í blóðheitum stuðningsmönnum gríska félagsins.
Arnar Grétarsson þjálfari karlaliðs Vals lék með AEK í Aþenu og var síðar yfirmaður knattspyrnumála hjá sama félagi. Hann þekkir því vel til íþróttalífsins í Grikklandi.
„Við erum búnir að fá nokkrar sögur frá Arnari. Mestu lætin eru þegar AEK mætir Olympiacos. Þeir skiptu um höll og spila í stærri höll. Þeir eru í úrslitum í fótboltanum, körfuboltanum og handboltanum.
Vonandi mæta þeir allra hörðustu. Það er enn meira gaman að spila þá og er reynsla fyrir mína gaura. Þeir eru mjög blóðheitir og mikil stemning á pöllunum,“ sagði Óskar Bjarni Óskarsson þjálfari Vals við mbl.is.