Valur vann glæsilegan sigur á gríska stórliðinu Olympiacos, 30:26, í fyrri úrslitaleik liðanna í Evrópubikar karla í handbolta á Hlíðarenda í kvöld. Valsmenn standa því nokkuð vel að vígi fyrir seinni leikinn í Aþenu eftir viku.
Það tók Valsmenn fimm mínútur að komast í gang því staðan eftir fimm mínútna leik var 2:0 fyrir Olympiacos. Var það hins vegar í eina skiptið sem munurinn var meiri en eitt mark allan fyrri hálfleik.
Valsmenn voru snöggir að jafna í 2:2 og skiptust liðin á að vera með eins marks forystu út hálfleikinn. Það var því við hæfi að það var allt hnífjafnt í hálfleik, 14:14.
Benedikt Gunnar Óskarsson lék best Valsmanna í fyrri hálfleik og var hann markahæstur með fjögur mörk. Næstu þrír Valsmenn skoruðu tvö mörk hvert. Gríska stórskyttan Savvas Savvas var markahæstur allra á vellinum í hálfleiknum með fimm mörk.
Björgvin Páll Gústavsson varði sex skot í markinu, en hefði getað gert betur í nokkrum mörkum gestanna.
Seinni hálfleikur byrjaði á sömu nótum og liðin skiptust á að skora. Valur komst svo tveimur mörkum yfir í fyrsta skipti í stöðunni 20:18 og svo í kjölfarið þremur yfir í 21:18 þegar 20 mínútur voru eftir.
Gestirnir skoruðu næstu þrjú mörk og jöfnuðu í 21:21. Því svöruðu Valsmenn og voru íslensku bikarmeistararnir tveimur mörkum yfir þegar tólf mínútur voru eftir, 23:21. Sem fyrr svöruðu gestirnir og jöfnuðu í 24:24, sem var staðan þegar átta mínútur voru eftir.
Rétt eins og áður í seinni hálfleik brugðust Valsmenn við og náðu aftur þriggja marka forskoti, 27:24. Tókst gestunum ekki að jafna eftir það og Valur fer með fjögurra marka forskot til Aþenu.