Landsliðsmennirnir Elvar Örn Jónsson og Arnar Freyr Arnarsson missa báðir af síðustu tveimur leikjum Melsungen í efstu deild þýska handboltans.
Melsungen er í mikilli Evrópubaráttu en liðið er með 41 stig í fimmta sæti, fjórum stigum á undan lærisveinum Guðjóns Vals Sigurðssonar í Gummersbach, sem á þó leik til góða.
Melsungen mætir Göppingen á útivelli og Kiel á heimavelli í síðustu tveimur umferðunum. Liðið þarf aðeins sigur í öðrum hvorum leiknum til að tryggja Evrópusætið.
Elvar Örn er að glíma við meiðsli í nára sem héldu honum frá landsleikjunum gegn Eistlandi í umspili EM fyrr í þessum mánuði. Arnar Freyr var með í landsleikjunum tveimur en hefur nælt sér í pest.