Belgía vann sannfærandi 3:0-sigur á Panama í Sochi í fyrsta leik liðanna í G-riðli heimsmeistaramótsins í Rússlandi rétt í þessu. Öll mörkin komu í síðari hálfleik.
Belgar voru mikið mun sigurstranglegri fyrir leik en voru heldur þunglamalegir og stirðir fyrstu 45 mínúturnar. Staðan var markalaus í hálfleik en leikmenn Panama stóðu vaktina vel í vörninni í þau skipti sem á þá reyndi, sem voru ekki mörg.
Í síðari hálfleik brast loks stíflan. Belgar brutu ísinn strax á 47. mínútu með glæsimarki. Dries Mertens fékk hann til sín við vítateigshornið hægra megin og hann lyfti boltanum viðstöðulaust í fjærhornið, yfir Jamie Penedo í marki Panama.
Á 69. mínútu varð staðan 2:0-þegar Romelu Lukaku skallaði boltann í netið eftir fyrirgjöf Eden Hazard og Lukaku var ekki búinn. Sex mínútum síðar skoraði hann annað mark sitt með vippu yfir Penedo eftir að Hazard stakk boltanum inn fyrir á framherjann.
Belgar eru á toppi G-riðils en síðar í kvöld mætast England og Túnis í hinum leik riðilsins.