Stuðningsmenn hinnar miklu knattspyrnuþjóðar Brasilíu, gefa sér greinilega tíma til að gefa íslenska landsliðinu gaum á HM, eins og mbl.is rak sig á í Moskvu.
Blaðamaður mbl.is hitti nokkra brasilíska knattspyrnuunnendur fyrir utan Spartak-leikvanginn að loknu jafntefli Íslands og Argentínu.
Voru hinir brasilísku hæstánægðir en þeim leiðist svo sem ekki að sjá Argentínumenn tapa stigum á fótboltavellinum svona alla jafna.
Sú var þó ekki eina skýringin í þetta skiptið því þessir brasilísku stuðningsmenn halda með Íslandi á HM ásamt Brasilíu. Er það ekki bara í orði heldur einnig á borði því þessir félagar létuu gera sérstaka boli þar sem Brasilía og Ísland fá jafnmikið pláss. Sögðu þeir bolina undirstrika að þeir haldi með tveimur þjóðum á HM, Brasilíu sem fimm sinnum hefur sigrað í keppninni og Íslandi sem þar þreytir nú frumraun sína.