Þýska knattspyrnusambandið má eiga von á refsingu frá FIFA, Alþjóða knattspyrnusambandinu, eftir að Hansi Flick þjálfari þýska landsliðsins mætti aleinn á fréttamannafund daginn fyrir leik liðsins gegn Spánverjum.
Samkvæmt reglum FIFA eiga öll liðin í lokakeppni HM í Katar að senda bæði þjálfara og leikmann á fréttamannafund daginn fyrir leik.
Flick sagði aðspurður fyrir fundinn að hann hefði ekki getað boðið leikmanni upp á slíkt ferðalag innan við 30 tímum fyrir leik en um 100 kílómetrar eru frá liðshóteli Þjóðverja að alþjóðlegu fréttamannamiðstöðinni í Doha þar sem fréttamannafundirnir eru haldnir.
Þýska knattspyrnusambandið hafði reynt að fá fundinn færðan yfir á hótel þýsku fréttamannanna í Al-Shamal en FIFA hafnaði því.