Enska knattspyrnufélagið Liverpool er mjög áhugasamt um að kaupa Sofyan Amrabat, miðjumann Fiorentina og marokkóska landsliðsins. Amrabat hefur slegið í gegn með Marokkó á HM í Katar.
Átti Amrabat sérlega góðan leik gegn Spáni í 16-liða úrslitunum í gær. Átti stóran þátt í að Marokkó hélt hreinu og vann síðan í vítakeppni.
Amrabat leikur sem djúpur miðjumaður og stöðvaði hann hvað eftir annað álitlegar sóknir Spánverja.
Blaðamaðurinn áreiðanlegi Fabrizio Romano greinir frá að frammistaða miðjumannsins á HM hafi vakið áhuga stærri félaga og er Liverpool eitt þeirra sem hafa áhuga á leikmanninum.
Brasilíumaðurinn Fabinho hefur átt erfitt uppdráttar hjá Liverpool á leiktíðinni og gæti Amrabat, sem er 26 ára, leyst hann af hólmi.