Frakkar taplausir á HM í sex ár

Timothy N’Guessan bjargaði Frökkum frá því að tapa fyrsta leik sínum á heimsmeistaramóti í handknattleik frá árinu 2013 þegar hann jafnaði metin gegn Þjóðverjum þremur sekúndum fyrir leikslok í mögnuðum leik í A-riðli heimsmeistaramótsins í Berlín í gærkvöld.

Frakkar hafa þar með spilað 22 leiki í röð án ósigurs í úrslitakeppni heimsmeistaramótsins en óhætt er að segja að þeir hafa sloppið með skrekkinn í gærkvöld í klárlega besta leik keppninnar til þessa.

Frakkar töpuðu síðast á heimsmeistaramóti á HM á Spáni 2013 þegar þeir biðu lægri hlut fyrir Þjóðverjum í riðlakeppninni 32:30. Frakkar eru sexfaldir heimsmeistarar en þeir unnu sinn fyrsta heimsmeistaratitil á Íslandi árið 1995 og hafa síðan hampað heimsmeistaratitlinum 2001, 2009, 2011, 2015 og 2017.

„Leikurinn var frá upphafi til enda frábær og það er góður andi okkar liði í dag. Við erum ánægðir með að hafa tekið stig af heimsmeisturunum,“ sagði Christian Prokop, þjálfari þýska landsliðsins, eftir leikinn en í fyrrakvöld fengu Þjóðverjar einnig jöfnunarmark á sig á lokasekúndunum gegn Rússum.

„Þetta var virkilega erfiður leikur en ég verð að hrósa mínu liðinu. Það hélt haus allan tímann,“ sagði Didier Dinart þjálfari Frakka eftir leikinn.

• Blogga um frétt