Þjóðverjar og heimsmeistarar Frakka tryggðu sér í kvöld sæti í undanúrslitum á heimsmeistaramótinu í handknattleik.
Þjóðverjar höfðu betur gegn Króötum 22:21 í æsispennandi leik í milliriðli 1 í Köln í kvöld. Með sigrinum tryggðu Þjóðverjarnir sér sæti í undanúrslitunum og sigur þeirra gerði að verkum að Frakkar eru einnig komnir áfram. Frakkar og Þjóðverjar hafa 7 stig fyrir lokaumferðina á miðvikudag en Króatar og Spánverjar eru með 4 stig.
Staðan var 11:11 í hálfleik en í seinni hálfleik náðu Þjóðverjar að komast þremur mörkum yfir. Króatarnir neituðu að gefast upp og náðu eins marks forskoti en vel studdir af áhorfendum Lanxess Arena reyndust Þjóðverjarnir sterkari á endaprettinum.
Mörk Króatíu: Igor Karacic 4, Manuel Strlek 4, Marin Sipic 3, Domagoj Duvnjak 2, Luka Stepancic 2, Zlatko Horvat 2, Zljko Musa 2, David Mandic 1, Jakov Vrankovic 1.
Mörk Þýskalands: Fabian Wiede 6, Uwe Gensheimer 4, Hendrik Pekeler 3, Steffen Fath 2, Kai Hafner 2, Fabian Bohm 2, Jannik Kohlbacher 2, Patrick Wiencek 1.
Danir stigu stórt skref í átt að undanúrslitunum með því að vinna sex marka sigur gegn Egyptum 26:20 í milliriðli 2. Egyptar stóðu í Dönunum fram í byrjun seinni hálfleiks en þá tóku Danir völdin og innbyrtu öruggan sigur en staðan í hálfleik var 9:7 Dönum í vil.
Mörk Egyptalands: Ali Zeinelabedin 6, Ahmed Elahmar 4, Yahia Omar 3, Eslam Eissa 2, Omar Hagag 2, Wisam Nawar 2, Mohamed Shebib 1.
Mörk Danmerkur: Anders Zachariassen 5, Mikkel Hansen 5, Lasse Svan 4, Magnus Landin 4, Nikolaj Oris 3, Mads Mensah 2, Simon Hald 2, Rasmus Lauge 1.
Danir hafa 8 stig í efsta sæti en Norðmenn og Svíar eru með 6. Í lokaumferðinni mætast Danmörk og Svíþjóð annars vegar og hins vegar Noregur og Ungverjaland.