„Það var ekkert stórt að gerast í okkar leik. Hólmararnir [Snæfell] voru að spila vel og við erum eins og önnur lið sem töpum þegar við mætum ofjörlum okkar sem við gerðum í dag,“ sagði Andri Kristinsson, þjálfari Hauka, eftir tapið gegn Snæfelli í toppslag Dominos-deildar kvenna í körfuknattleik í kvöld.
„Þetta er það skemmtilegasta sem við gerum; að fara í alvöru leiki og fá spennu í þetta. Ég veit að okkar landsliðsleikmenn eru kannski ekki uppá það besta en þær spiluðu ágætlega í dag þrátt fyrir það. Það á ekki að vera þannig að við þurfum þær til að skila 40 stigum í hverjum leik en ég hef trú á því að við förum að velta við nokkrum steinum sem sem var þörf á að velta við og trúi því að við séum enn besta lið landsins. Við sjáum svo bara hvort við getum ekki lagað nokkra hluti til að verða enn betri,“ sagði Andri.