Helena Sverrisdóttir, landsliðskona í körfuknattleik, mætir nokkrum af sterkari liðum Evrópu í Evrópubikar kvenna í vetur en hún gekk í vor til liðs við Ceglédi frá Ungverjalandi.
Ceglédi fer beint í riðlakeppni Evrópubikarsins og mætir þar frönsku liðunum BLMA Montpellier og Lyon Asvel og þýska liðinu Rutronik Stars Keltern í I-riðli. Leikið er heima og heiman og riðlakeppnin byrjar 25. október.
Lið Helenu endaði í sjötta sæti ungversku 1. deildarinnar síðasta vetur, féll út í átta liða úrslitunum um meistaratitilinn en hafnaði að lokum í fimmta sæti.
Lyon endaði í 5. sæti í frönsku A-deildinni og Montpellier í 7. sæti. Keltern varð þýskur meistari síðasta vetur.