Julius Randle átti stórleik fyrir New York Knicks þegar liðið vann góðan 118:109-sigur í framlengdum leik gegn Charlotte Hornets í NBA-deildinni í körfuknattleik í gær.
Randle náði þrefaldri tvennu; skoraði 33 stig, tók 10 fráköst og gaf 13 stoðsendingar.
Alls fóru sex leikir fram í NBA-deildinni í nótt.
Öll úrslit næturinnar:
New York – Charlotte 118:109 (frl.)
Brooklyn – Chicago 105:91
Indiana – LA Lakers 115:122
Minnesota – Boston 108:124
San Antonio – Phoenix 103:140
Milwaukee – Miami 122:108
Í austurdeildinni er það orðið ljóst hvaða lið eru komin í úrslitakeppnina um meistaratitilinn í NBA. Það eru Philadelphia, Brooklyn, Milwaukee, New York, Atlanta og Miami. Í umspil um að komast í úrslitakeppnina fara Boston, Charlotte, Washington og Indiana.
Í vesturdeildinni eru línur sömuleiðis farnar að skýrast. Liðin sem fara í úrslitakeppnina eru Utah, Phoenix, Denver, LA Clippers og Dallas. Í umspilið fara Golden State, Memphis og San Antonio.
Það eina sem út af stendur í vesturdeildinni er hvort Portland eða LA Lakers fari beint í úrslitakeppnina eða í umspilið. Það kemur í ljós í lokaumferð deildarinnar í kvöld og næstu nótt.