Íslendingar í málaferlum í Milwaukee

Íslenskt félag, í eigu Milestone, sem fjárfest hefur í byggingarverkefni í miðborg Milwaukee í Wisconsin í Bandaríkjunum, hefur óskað eftir því að dómari þar í borg skipi tilsjónarmann sem yfirtaki og ljúki við verkefnið.

Fram kemur í fjölmiðlum í Wisconsin að SJ Properties Suites BuyCo ehf. sem skráð er á Íslandi, hafi óskað eftir ígildi greiðslustöðvunar. BuyCo er til húsa í Kringlunni 5, höfuðstöðvum Sjóvár. 

Í dómsskjölum, sem vitnað er til, segist BuyCo hafa ásamt fjárfestingarbankanum Askar Capital hafa lagt fram 17,4 milljónir dala til verkefnisins, jafnvirði 2,2 milljarða króna. Askar Capital var í eigu Milestone en kröfuhafar hafa nú eignast bankann.

BuyCo stofnaði félag ásamt fleiri fjárfestum um verkefnið í  Milwaukee  þar sem stendur til að reisa 14 hæða byggingu með hóteli, íbúðum og verslunarsvæði. Framkvæmdir hafa legið niðri undanfarna mánuði og eina starfsemin í húsinu er skyndibitastaður. 

BuyCo stofnaði félag um framkvæmdina í nóvember 2006. Tveimur árum síðar gekk eitt félagið, Development Opportunity Corp., út úr félaginu vegna fjárhagserfiðleika og taldi sig ekki geta lagt fé til verkefnisins.  Annað félag, Economou, varð gjaldþrota í lok síðasta árs. 

BuyCo höfðaði í kjölfarið mál fyrir bandarískum dómstóli og sagði að   Economou og DOC hefðu notað fé, sem fara átti í verkefnið í  Milwaukee til að fjármagna önnur verkefni sem þau höfðu með höndum. 

Þá hafa 14 undirverktakar höfðað innheimtumál vegna samtals 3,45 milljóna dala krafna vegna vinnu við bygginguna.  Það eykur enn á vandamálin, að viðskiptabanki verkefnisins, Silverton Bank, er sjálfur í greiðslustöðvun.

Í málsskjölunum, sem vitnað er til, segir að Askar og BuyCo kunni að vera reiðubúin að leggja til aukið fjármagn til að ljúka verkefninu og hafi fundið nýjan samstarfsaðila.