Íslenska leikkonan Heiða Rún Sigurðardóttir, eða Heidi Reed eins og hún kallar sig þessa dagana, fer með hlutverk í bresku þáttunum Poldark. Á heimasíðu Independent má finna viðtal við Heiðu þar sem hún fjallar um þættina sem hefja göngu sína hinn 8. mars á BBC One. Í viðtalinu segir að þetta sé fyrsta stóra hlutverkið sem Heiða landar.
Þáttaröðin Poldark inniheldur átta þætti sem eiga að gerast á Englandi seint á 18. öld. Heiða fer með hlutverk Elizabeth Chenowth í þáttunum en hún trúlofast frænda unnusta síns þegar hún telur að unnustinn hafi látið lífið í frelsisstríði Bandaríkjanna gegn Bretum. Þegar unnustinn snýr til baka er Elizabeth ástfangin af tveimur mönnum.
Heiða segir í viðtalinu að þættirnir séu ekki grófir. „En það þýðir ekki að þarna séu ekki ástarsenur og nauðsynleg atriði. Þau eru til staðar en þau eru smekkleg,“ segir Heiða.
„[Elizabeth] verður fyrir árekstrum í ástalífinu. Hún er ástfangin af tveimur mönnum á ólíka vegu og ég vona að fólk átti sig á því,“ útskýrir Heiða. „Mér er sama hvort fólk elskar eða hatar Elizabeth, svo lengi sem fólk gerir það af ástríðu og vegna þess að það elskar persónurnar.“