Tískuhús Christian Dior hefur hlotið mikla gagnrýni fyrir að nota 14 ára fyrirsætu þegar þegar nýjasta haust/vetrar-línan var kynnt á tískuvikunni í París fyrr í mánuðinum. Hin 14 ára Sofia Mechetner gekk fyrst inn tískupallinn á sýningunni en hún er einnig andlit nýjustu auglýsingaherferðar merkisins.
Margt fólk fordæmir ákvörðun Raf Simons, listræns stjórnanda Christian Dior, fyrir að nota barnungar fyrirsætur í auglýsingar og tískusýningar.
Caroline Nokes, þingkona breska Íhaldsflokksins, hefur hingað til unnið að því að vekja athygli á áhrifum tískuiðnaðarins á sjálfsmynd ungs fólks. Hún segir málið vera „svekkjandi skref aftur á bak“. Hún vill sjá skýrar reglur settar í tengslum við allt sem snýr að ráðningu fyrirsæta fyrir tískusýningar og auglýsingaherferðir stórra tískuhúsa.
Raf Simons sjálfur hefur ekki enn svarað fyrir sig.