Um helmingur allra karlmanna í kringum fimmtugt kannast við að sjá kollvikin fara hækkandi og hárunum á höfðinu fækka. Við tekur ákveðin örvænting hjá sumum. Margir eiga erfitt með að missa hárið og reyna að halda í síðustu stráin sem allra lengst. Donald Tump er dæmi um slíkan mann er hann skartar einni rosalegustu „comb-over“ allra tíma.
En þessir örvæntingarfullu þunnhærðu menn standa nú mögulega í þakkarskuld við vísindamenn sem starfa á Sanford-Burnham Medical-rannsóknarstofnuninni í San Diego í Kaliforníu. Hármissir gæti tilheyrt fortíðinni, þökk sé þeim vísindamönnum, því þeim tókst að láta hár vaxa með stofnfrumumeðferð.
Hafa gert tilraunir á rottum
Fyrri tilraunir til að búa til heilbrigðan hárpoka hafa misheppnast en nýverið tókst hópi vísindamanna loks að finna lausn á málinu. Frá þessu er greint á heimasíðu Telegraph.
Vísindamennirnir hafa þróað ákveðna aðferð til að búa til heilbrigða hársekki og hafa hingað til aðeins gert tilraunir á rottum.
„Stofnfrumuaðferðin okkar gefur okkur ótakmarkað magn af frumum sem hægt er að búa til heilbrigða hársekki úr,“ sagði prófessorinn Alexey Terskikh. Næsta skref er þá að prófa meðferðina á manneskju að sögn Terskikhs.