Hilaria Baldwin, eiginkona leikarans Alecs Baldwins, eignaðist sitt annað barn, drenginn Rafael, fyrir rúmri viku og síðan þá hefur hún birt myndir af sér á Instagram til að sýna hvernig líkami hennar er að jafna sig.
„Nýjar upplýsingar. Rafael hefur það frábært. Hann er tveggja daga gamall núna. Hann er yndislegur lítill drengur. Ég hef það gott, ég hef vaknað með honum á tveggja tíma fresti. Ég hef alltaf ætlað mér að birta myndaröð af maganum eftir barnsburð en ég var ekki viss um að ég hefði kjarkinn í það. Ég vona að þið skiljið ásetning minn hérna: ég trúi því að það sé mikilvægt að sætta sig við og elska líkamann eftir að hafa gengið í gegnum það að koma nýju lífi í heiminn,“ skrifaði Hilaria við fyrstu myndina sem hún birti. Síðan þá hefur hún birt tvær aðrar myndir.
Hún hefur fengið góð viðbrögð við myndbirtingunum. Einhverjir fóru þó að rífast í athugasemdakerfinu því sumir héldu því fram að hún hefði farið í keisaraskurð. „Ég fór ekki í keisaraskurð,“ skrifaði Hilaria þá.
Hilaria og Alec giftu sig árið 2013. Saman eiga þau tvö börn, dóttur og son.