Hvað er til ráða við brjóstvexti karla?

„Brjóstvöxtur (gynecomastia) er þekkt vandamál meðal karla og er yfirleitt vegna breytinga á framleiðslu kynhormónanna testósteróns og estrógens. Brjóstastækkun getur komið fram í bara öðru brjóstinu eða  báðum og stundum er hún mismikil milli brjósta. Þetta er yfirleitt hættulaust ástand og ekki er ástæða til inngripa en geta stundum fylgt óþægindi eða sársauki og tilfinningaleg vanlíðan vegna breyttrar líkamsmyndar,“ skrifar hjúkrunarfræðingurinn Guðrún Ólafsdóttir í pistil sem birtist á doktor.is.

En hvað er til ráða? „Oft minnka brjóstin aftur án inngripa en stundum eru notuð lyf eða aðgerð til að minnka brjóstvefinn. Þar sem brjóstvefur er að mestu fituvefur getur hjálpað að breyta matarræði og draga úr sykur- og fituneyslu. Sumum hefur tekist að minnka brjóstin með sértækum æfingum og gott er að fá ráð hjá þjálfurum hvaða æfingar eru bestar til þess,“ skrifar Guðrún.

Stundum þarf að grípa til róttækari aðgerða. „Stundum eru fituvefur eða kirtlar fjarlægðir með skurðaðgerð. Annars vegar með fitusogi og er þá gerður lítill skurður hliðlægt á brjóstkassa.  Ef kirtilvefurinn er mjög þéttur í sér og erfitt að ná til hans með sogi þarf að skera og fjarlægja hann þannig. Þá er skorið við geirvörtu,“ skrifar Guðrún í pistilinn sem lesa má í heild sinni á vefnum doktor.is.

Breytt mataræði getur haft mikið að segja. Getty images

• Blogga um frétt