Líkamsræktarkonan Elianne Alexander hefur eytt síðasta ári í að hvetja fólk til þess að sækjast eftir heilbrigðum lífstíl í staðinn fyrir sérstaka líkamslögun. Þó svo að Alexander líti út fyrir að lifa heilbrigðum lífstíl léttilega hefur hún viðurkennt fúslega að það var henni mjög erfitt ferli að komast á þann stað sem hún er á í dag.
Nýlega birti hún mynd á Instagram-síðu sinni þar sem að hún lýsir breytingunum sem hún hefur farið í gegnum síðustu 16 árin. Hún deildi reynslu sinni frá því að vera hættulega grönn, yfir í að vera í yfirþyngd og nú þar sem hún er heilsusamleg og hamingjusöm með þyngd sína.
„Þegar ég var yngri hélt ég að því fleiri bein sem sæjust í gegnum húðina, því sætari væri konan,“ sagði Alexander í viðtali við Shape. „Það var mín skilgreining á fegurð.“
Þegar Alexander var tvítug hreyfði hún sig ekkert, í staðinn sleppti hún því að borða alveg þangað til hún var svo sársvöng að hún át yfir sig. Þegar hún varð 23 ára sagði læknir hennar henni að hún væri svo létt að hún gæti ekki eignast barn.
Það var þá sem hún vissi að hún yrði að borða meira og þyngdist þá um rúmlega 40 kíló. „Þetta var ekki bara erfitt vegna þess að mér leið illa með sjálfa mig heldur var ég einnig dauðþreytt eftir að labba rúman kílómetra.“
Til þess að losna við aukakílóin ákvað Alexander að prófa Atkins-mataræðið og taka smá brennslu í ræktinni. Hún var á þessu mataræði í tvö ár áður en að hún prófaði síðan einhverja megrunar- og safakúra. „Ég var svo hrædd við að þyngjast aftur að ég drakk alls konar sukk bara svo ég þyrfti ekki að borða neinn mat.“
Það var ekki fyrr en í ágúst 2015, þegar hún byrjaði að æfa með hópi fólks, að hugmyndir hennar um heilsu fóru að breytast og verða heilbrigðari. Nú veit hún að hún á að einbeita sér að því hvernig henni líður, ekki hvernig hún lítur út.
„Markmið mín snúast bara um hvað líkaminn minn getur gert í staðinn fyrir hvernig hann er í speglinum,“ sagði hún. „Það skiptir mig engu máli lengur.“