Gamli stíllinn ræður ríkjum á Sunnuvegi

Við Sunnuveg 25 í póstnúmeri 104 stendur skemmtileg 328 fermetra eign með mikla möguleika. Húsið var byggt árið 1964 og upprunalegur stíll ræður ríkjum.

„Einbýlishús með innbyggðum bílskúr og tveggja herbergja aukaíbúð með sérinngangi. Einstök staðsetning á skjólsælum stað við Laugardalinn. Samkvæmt skráningu Þjóðskrár Íslands er flatarmál eignarinnar 328,3 fm. Í húsinu er 55,4 fm aukaíbúð. Bílskúr er innbyggður og skráður 20 fm en er u.þ.b. 40 fm að meðtöldu óskráðu rými. Byggingarár er 1964,“ segir á fasteignavef mbl.is.

„Aðalinngangur snýr út í stóran, fallegan suðurgarð. Forstofa og hol með fatahengi. Gestasnyrting með gólfflísum og glugga. Stór teppalögð stofa með mikilli lofthæð. Stofa opnast upp í opið rými á efri hæð sem nýtt er sem skrifstofa og vinnurými. Arinn í stofu. Stórt eldhús með gólfdúk og borðkróki. Við borðkrók eru suðursvalir. Stórt þvottaherbergi.  Efri hæð skiptist í vinnurými upp af stofu, mjög stórt hjónaherbergi með suðursvölum og fallegu útsýni , 2 svefnherbergi og baðherbergi. Gólfdúkar á herbergjum og sérsmíðaðir fataskápar. Arinn í öðru herberginu.“

Það er fasteignasalan Eignamiðlun sem sér um söluna á þessu skemmtilega húsi.