Hrekkjavakan er á næsta leyti og margir farnir að undirbúa kvöldið.

Nú geta tveir heppnir einstaklingar fengið að gista í kastala í Transylvaníu, þeim sama og talinn er hafa verið innblásturinn að heimkynnum Drakúla greifa í sögu Bram Stoker.

Parið sem dettur í lukkupottinn fær einnig að fara í skoðunarferð á hestvagni, áður en þau verða leidd í gegnum leynilegan inngang í kastalann þar sem boðið verður upp á kræsingar. Og er þá ekki átt við blóð.

Líkkisturnar sem gist verður í eru svo sagðar vera sérlega kósý, en þær eru klæddar með mjúku sléttflaueli fyrir aukin þægindi.

Hinir heppnu gestir verða að fara eftir nokkrum einföldum reglum, til að mynda er hvítlaukur stranglega bannaður á svæðinu. Áhugasamir geta fengið frekari upplýsingar um kastalann hér.

Þetta er ekki í fyrsta skipti sem Airbnb bregður á leik, en á síðasta ári gafst heppnu pari tækifæri á að eyða nóttinni í dimmu og drungalegu grafhýsi.

Frétt mbl.is: Grafhvelfing til leigu