Selma Svavarsdóttir viðskiptafræðingur sem starfar hjá Landsvirkjun hefur búið sér og fjölskyldu sinni smekklegt og persónulegt heimili í Fossvogi. Selma, sem er fagurkeri fram í fingurgóma, rekur jafnframt vefverslunina Heimilisfélagið sem hún sinnir í frístundum, enda mikil áhugamanneskja um hönnun.
Selma segir flesta nýja hluti á heimilinu undanfarið koma úr Heimilisfélaginu. „Enda fást í Heimilisfélaginu eingöngu hlutir sem mig dauðlangar í fyrir heimilið, sjálfa mig eða heimilisfólkið.“
Hvað varðar innblástur segir Selma sér finnast notalegt að fara á kaffihús og blaða í gegnum tímarit og reynir að gera mikið af því. „Annars tollir eins og hálfs árs strákurinn minn ekki inni á kaffihúsi og hleypur bara út, þannig að það hefur aðeins dregið úr kaffihúsaferðum undanfarna mánuði. En svo er alltaf hægt að stóla á að fá innblástur á Pinterest, en ég nota það meira ef ég er að leita markvisst að einhverju afmörkuðu.“
Selma segir eldhúsið uppáhaldsstaðinn sinn á heimilinu enda afskaplega vel heppnað rými. „Við skiptum um eldhús fyrir tveimur árum og nú finnst mér það vera búið að taka á sig góða mynd. Annars erum við mikið niðri í mjúka sjónvarpssófanum okkar og næst á dagskrá er að gera það rými huggulegra,“ útskýrir hún.
Spurð að lokum hvað sé í eftirlæti í hverfinu segir Selma það sem hana vanti tilfinnanlega í Fossvoginn vera kaffihús, með góðu kaffi, netsambandi og tímaritum til að glugga í. „Ég er búin að útfæra þetta kaffihús í huganum, útlitið, veitingarnar og líka praktísku hliðarnar og bíð spennt eftir aðilanum sem dembir sér í þetta. Ég skal aðstoða!“