„Þessi litla kaka er alveg dásamleg en það er búið að taka nokkrar tilraunir í að mastera hana. Fyrst varð hún rosalega stökk að utan en það var vegna þess að eitthvað tókst ekki nógu vel með eggjahvíturnar hjá mér. Ég notaði líka mjög mikið af skálum fyrst en nú er ég búin að einfalda vinnuaðferðina eins og ég mögulega get. Ég elska möndlu, sítrónu- og vanillubragð og vantaði hollan staðgengil möndlukökunnar með bleika kreminu. Þessi gefur henni ekkert eftir. Fjölskyldan mín er bestu dómararnir á það sem tekst vel og ekki vel hjá mér og maðurinn minn sem borðar aldrei kökur borðaði hálfa kökuna loksins þegar hún tókst vel svo ég varð að gera hana aftur til að ná almennilegri mynd af henni. En það eru bestu meðmælin og gladdi mig óendanlega mikið,“ segir Valdís Sigurgeirsdóttir matarbloggari á ljomandi.is og flugfreyja hjá Icelandair. 

1 1/2 bolli (ca 180gr) möndlumjöl

1/4 tsk. kardimomma

2 tsk. vínsteinslyftiduft

4 egg (rauður og hvítur aðskildar)

1/2 bolli kókospálmasykur (skipt í helming)

1/2 bolli kókosolía

1/2 tsk. vanillusykur 

1 tsk. vanillu extract eða vanilludropar

1/2 tsk. sítrónudropar

rifinn sítrónubörkur af einni sítrónu (ca 1/2 tsk)

smá sítrónusafi

1 tsk. hvítt edik

smá salt

1. Smyrjið 20 cm (8 in) kökuform eða klippið til bökunarpappír i botninn. Þessi uppskrift/kaka er frekar lítil.
2. Setjið möndlumjöl, kardimommu og vínsteinslyftiduft í skál og geymið til hliðar.
3. Skiljið að eggjarauður og hvítur. Setjið eggjarauðurnar bara beint í hrærivélaskálina og hvíturnar í skál sem þið getið þeytt þær í. Passið vel að engin rauða sé í hvítunum þá verða hvíturnar ekki léttar og loftkenndar eins og við viljum.
4. Hrærið saman í hrærivél eggjarauðum, rúmlega helmingnum af sykrinum, kókosolíunni, vanillusykrinum, vanilludropunum, sítrónudropum og sítrónusafanum. Hér má líka nota sítrónuilmkjarnaolíu frá t.d. Young Living en þá er nóg að setja bara 6-7 dropa.
5. Bætið þurrefnunum út í og að lokum sítrónuberkinum. Deigið er frekar klístrað og á ekki að vera þurrt.
6. Þeytið hvíturnar. Ég gerði það s.s. í annarri skál með handþeytara. Byrjið rólega og þegar loftbólur byrja að myndast setjið þá smá salt út í ásamt edikinu því það hjálpar hvítunum að verða flottar. Bætið síðan restinni af sykrinum út í hvíturnar hægt og rólega og hrærið saman.
7. Setjið eggjahvíturnar saman við deigið rólega svo það verði léttara.
8. Bakið í ca. 30 mínútur við 175 gráður.

Sítrónukaka sem Valdís er búin að mastera enda þurfti hún að gera nokkrar tilraunir til þess að fá kökuna eins og hún vildi hafa hana. Ljósmynd/Valdís Sigurgeirsdóttir

Tengdar fréttir

Uppskriftir

Ómótstæðilega girnilegur Calzone

• 10 bestu hamborgararnir í tilefni sumardagsins fyrsta
• Sigurkokteilarnir geta orðið sumarsmellirnir í ár
• Af hverju að búa til granóla?
• Bragðmikill og ljúffengur fiskréttur með pestó og bræddum osti

» Fleiri tengdar fréttir

• Blogga um frétt