Einhverja bestu baunasúpu sem ég hef bragðað fékk ég í Piemonte á Norður-Ítalíu á köldu janúarkvöldi árið 2012 í heimboði með feðgunum Paolo og Luca de Marchi. Þar ræddu þeir um endurreisn víngerðarinnar í Lessona og fjölskyldubúgarðsins Proprieta Sperina á meðan eiginkona Luca framreidd þessa undursamlegu baunasúpu. Hér er gerð tilraun til að endurskapa þá súpu. Hér eru notaðar Cannellini-baunir eða hvítar nýrnabaunir. Það er hægt að forsjóða þurrkaðar baunir eða nota niðursoðnar baunir.
Saxið gulrætur, lauk og sellerí í litla teninga. Fínsaxið hvítlaukinn. Skerið pancetta niður í litla bita.
Hitið olíu í þykkum potti og steikið pancetta í nokkrar mínútur. Bætið þá lauk, sellerí og gulrótum saman við og mýkið í um 5 mínútur. Bætið þá hvítlauk út í og klípu af chiliflögum.
Útbúið kryddvönd með því að binda saman timjanstöngla, rósmarínstöngul og steinseljustöngul ásamt lárviðarlaufi.
Opnið baunadósirnar og hellið vökvanum frá. Bætið baununum út í pottinn. Hellið kjúklingasoðinu í pottinn og setjið kryddvöndinn út í. Látið malla á vægum hita í um 45 mínútur. Takið kryddvöndinn upp úr og hendið.
Til að fá þykkari súpu er hægt að taka um 2/3 af súpunni og mauka í matvínnsluvél. Bæta síðan aftur saman við restina í pottinum.
Berið súpuna fram með nýrifnum parmesan og góðri ólífuolíu sem er hellt yfir súpuna í skálinni.
Fleiri spennandi súpuuppskriftir finnið þið með því að smella hér og til að skoða fleiri ítalskar uppskriftir smellið þið hér.
Uppskrift: vinotek.is