Kompaní, Viðskiptaklúbbur Morgunblaðsins og mbl.is, hélt sinn þriðja morgunverðarfund í dag. Fyrirlesari var Guðmundur Arnar Guðmundsson markaðsstjóri Nova og fjallaði hann á líflegan og skemmtilegan hátt um það helsta sem hafa þarf í huga í tengslum við vefborða og hvernig maður nær hámarksárangri með slíkum auglýsingum. Auk þess að vera markaðsstjóri Nova kennir hann markaðsfræði við Háskólann í Reykjavík. Hann er fyrrum stjórnarformaður ÍMARK og er annar höfundur bókarinnar Markaðssetning á netinu.
Guðmundur er hagfræðingur að mennt, með MBA í markaðsfræðum og víðtæka reynslu af markaðsmálum og uppbyggingu vörumerkja. Áður hefur Guðmundur starfað sem markaðsstjóri WOW air, markaðsstjóri Icelandair í Bretlandi og sem vörumerkjastjóri Icelandair á Íslandi.
Eins og sést á myndunum mætti fjölmenni til að hlusta á Guðmund Arnar. Fyrir þá sem ekki þekkja Kompaní þá er það Viðskiptaklúbbur Morgunblaðsins og mbl.is sem sameinar starfandi fólk á Íslandi. Þetta er vettvangur til að veita viðskiptavinum enn betri þjónustu þar sem hægt er að hlýða á fræðslufundi og fyrirlestra, fylgjast með nýjungum og læra af reynslu annarra sem þekkja hvað það er að reka fyrirtæki á Íslandi.