Creditinfo veitti framúrskarandi fyrirtækjum viðurkenningar í Hörpu í síðdegis í gær fyrir rekstrarárið 2014, að viðstöddum Bjarna Benediktssyni, fjármála- og efnahagsráðherra. 682 fyrirtæki teljast framúrskarandi eða um 2% af öllum skráðum fyrirtækjum á Íslandi.

Framúrskarandi fyrirtækjum hefur fjölgað verulega en Creditinfo hefur birt lista framúrskarandi fyrirtækja frá árinu 2010 en þá voru einungis 178 félög á listanum. Þessi fyrirtæki eiga það sammerkt að sýna stöðugleika í rekstri og eru líkleg til að efla hag hluthafa og fjárfesta. Sérstakir samstarfsaðilar Creditinfo vegna Framúrskarandi fyrirtækja eru Samtök atvinnulífsins, Samtök iðnaðarins, Samtök verslunar og þjónustu, Félag kvenna í atvinnulífinu og Viðskiptaráð Íslands. 

Samherji er efstur á lista framúrskarandi fyrirtækja líkt og síðustu fjögur ár. Á eftir fylgja Norðurál, Icelandair Group, Össur og Stálskip. Fjármálaráðherra afhenti fyrirtækjunum Kjarnepli, LS Retail og Högum sérstök verðlaun. Kjarnepli fékk viðurkenningu fyrir að vera yngsta fyrirtækið á listanum en það var stofnað í september 2012, Hagar fyrir það að vera efst á lista yfir þau fyrirtæki sem koma ný inn í ár en félagið er í níunda sæti á listanum og LS Retail fékk viðurkenningu fyrir að færast upp um flest sæti á milli ára eða um 387 sæti, félagið er nú í 69. sæti á listanum. Ennfremur fengu um eitt hundrað fyrirtæki sem hafa verið á listanum frá upphafi sérstaka gullvottun.