Hjónin Ingileif Friðriksdóttir og María Rut Kristinsdóttir voru í essinu sínu þegar þær buðu til útgáfuteitis þar sem þær fögnuðu útgáfu á tveimur bókum. Þær fögnuðu líka tvöföldu afmæli sínu í leiðinni. 

Fyrsta skáldsaga Ingileifar, Ljósbrot, kom út í vikunni en hún fjallar um forsetaframbjóðanda en bókin var skrifuð löngu áður en ljóst var að spennandi forsetakosningar væru framundan. Það var því viðeigandi að forsetaframbjóðendur létu sjá sig í teitinu en Halla Tómasdóttir lét sig ekki vanta, heldur ekki Katrín Jakobsdóttir og Halla Hrund Logadóttir. Bókin fjallar þó ekki um forsetakosningar heldur um ástina og leitina að sjálfinu.   

María og Ingileif fögnuðu líka útgáfu annarrar bókarinnar í flokknum um Úlf og Ylfu en bókunum er ætlað að fagna fjölbreytileikanum með því að sýna hann í allri sinni dýrð í skemmtilegum sögum fyrir hressa krakka. Fallegar myndir bókarinnar teiknar húðflúrarinn Auður Ýr Elísabetardóttir. 

Plötusnúðadúettinn Glókollur hélt uppi stuðinu og Einar Aron töframaður gerði blöðrudýr fyrir yngstu kynslóðina. Eins og sjá má á meðfylgjandi myndum voru allir í essinu sínu og enginn á röngunni.