Er makinn alltaf í símanum?

Margir þekkja það að setjast til borðs á rómantískum veitingastað, panta sér drykk, spjalla svolítið og búa sig undir góða kvöldstund með betri helmingnum. Sjá sér síðan til hrellingar að makinn er búinn að rífa upp símann og er farinn að skrolla í gegnum samfélagsmiðla. Bara rétt aðeins til að kíkja.

Samkvæmt rannsókn Baylor háskóla getur þessi símaárátta reynst samböndum afar skaðleg, líkt og lesa má í umfjöllun Women‘s Health.

„Við komumst að því að þegar einstaklingnum fannst makinn taka símann fram yfir sig skapaði það ágreining og leiddi til minni ánægju með sambandið,“ segir James A. Roberts, sem fór fyrir rannsókninni.

„Þessi vaxandi óánægja með sambandið leiddi síðan af sér vaxandi óánægju með lífið almennt, og í kjölfarið aukna tíðni þunglyndis.“

En hvað er til ráða?

Sálfræðingurinn Melanie Mills bendir á að fólk þurfi fyrst að líta í eigin barm og greina eigin hegðun áður en hjólað er í makann. Þá mælir hún með því að útskýrt sé fyrir makanum hvernig tilfinning fylgi því þegar síminn fái óskipta athygli. Að lokum mælir hún með að settar séu reglur á heimilinu, svo sem símalaus svæði og fleira í þeim dúr.

• Blogga um frétt