Mörg hjón þekkja það vandamál að halda ástríðu sambandsins á lofti eftir margra ára hjónaband. Sem betur fer hafa vísindamenn fundið leið sem hjálpar að koma neistum sambandsins aftur á flug – með myndum af hvolpum og kanínum.
Rannsóknina gerði teymi sálfræðinga úr Florida State-háskóla þar sem þeir vildu komast að því hvort að hægt væri að auka ánægju í hjónabandi með því að breyta því hvernig fólk hugsar um maka sína.
144 hjón undir 40 ára aldri tóku þátt í rannsókninni. Þau höfðu öll verið gift í minna en fimm ár og meðalaldur var 28 ára. Þegar þau tóku fyrst þátt mældu rannsóknarmennirnir hversu hamingjusöm þau voru í hjónabandinu.
Hjónunum var skipt upp í tvo hópa, þar sem annar hópurinn sá myndir af maka sínum með jákvæðum orðum og myndum (hvolpar og kanínur) en hinn sá myndir af maka sínum með hlutlausum orðum og myndum. Þetta þurfti hver hópur að gera þrisvar í viku í sex vikur.
Niðurstaða rannsóknarinnar var sú að hópurinn sem sá aðeins jákvæðar myndir sagðist vera hamingjusamari í hjónabandi sínu en hann var fyrst. Ekkert breyttist hjá þeim sem sáu hlutlausar myndir.
Þessar niðurstöður gefa til kynna að við þurfum aðeins að tengja maka okkar við jákvæða hluti, eins og hvolpa og kanínur, og þá horfum við á þá með jákvæðari augum og neistarnir fara aftur á flug.