„Þó að þau gætu ekki fjárhagslega stutt mig til þess var alltaf mikill andlegur stuðningur frá foreldrum mínum, að mér gengi vel í skóla, og mér gekk vel. Ég á tvær systur sem eru báðar leikskólakennarar, þær höfðu ekki jafngaman af skóla og ég. Þau studdu mikið við mig, að fara til náms,“ sagði Halla Tómasdóttir forsetaframbjóðandi í viðtali við Spegilinn á RÚV. HÉR er hægt að hlusta á viðtalið í heild sinni.
Þessi ummæli fóru fyrir brjóstið á leikskólakennurum sem finnst hún vera að gera lítið úr starfi þeirra. Einn þeirra er Haraldur F. Gíslason, leikskólakennari og tónlistarmaður í Pollapönk.
„Hef ekki tjáð mig mikið um forsetaframbjóðendur en finnst þetta of vandræðalegt til að minnast ekki á þetta.
Halla segir: „Ég á tvær systur sem eru báðar leikskólakennarar, þær höfðu ekki jafngaman af skóla og ég. Þau studdu mikið við mig, að fara til náms.“
„Höllu til upplýsingar þá til þess að verða leikskólakennari þarftu að fara í fimm ára krefjandi háskólanám. Vissulega er ekki skilyrði að hafa gaman af því en það sjálfsagt hjálpar,“ segir Haraldur á Facebook-síðu sinni.