Raunveruleikastjarnan Kourtney Kardashian deildi á dögunum persónulegum leiðarvísi um Íslandsför Kardashian-systranna á heimasíðu sinni. Í pistlinum fór Kourtney yfir ferðasöguna og deildi með lesendum sínum hvað henni þótti skemmtilegast að gera á Íslandi, hver væru bestu hótelin og veitingastaðirnir.
Það er óhætt að segja að Kourtney hafi skemmt sér vel en hún mætti hingað til lands í apríl ásamt systur sinni Kim Kardashian, eiginmanni hennar Kanye West og fríðu föruneyti. Hugmyndina að Íslandsförinni áttu þau Kim og Kanye en rapparinn tók upp tónlistarmyndband hér á landi í ferðinni. Kourtney hafði hins vegar alltaf langað að koma hingað til lands og ákvað því að nýta tækifærið.
„Við fórum í Bláa lónið eitt kvöldið sem er alveg ótrúlega fallegt. Síðan sáum við líka Geysi og Gullfoss,“ sagði Kourtney í pistlinum. Þá sagði hún Hallgrímskirkju afar fallega og eitt af hennar uppáhaldsaugnablikum í ferðinni hafi verið að horfa yfir Reykjavík úr turni kirkjunnar.
„Hótel Rangá var mjög skemmtileg upplifun. Hvert herbergi er innréttað eftir mismunandi löndum og það var mjög gaman að fara í herbergin hjá hinum og sjá í hvaða landi þeir voru að gista.“ Í borginni gisti hópurinn á 101 Hótel sem Kourtney lýsir sem afar fallegu litlu hóteli.
Meðan á ferðinni stóð átti Kourtney 37 ára afmæli en svo virðist sem hún hafi notið dagsins í botn á Íslandi. „Ég mun aldrei gleyma þessari ferð, þetta var ógleymanleg upplifun.“