Íslensk kona giftist tómatsósuerfingja

Síðustu helgi gekk hin íslenska María Marteinsdóttir að eiga unnusta sinn og tómatsósuerfingjann, André Heinz.

Athöfnin, sem var hin glæsilegasta, fór fram á herragarði í Sörmland, suður af Stokkhólmi og voru gestirnir bæði ákaflega margir og á tíðum sérlega frægir.

Þá var John Kerry, utanríkisráðherra Bandaríkjanna, meðal gesta en hann er fósturfaðir brúðgumans. Óskarsverðlaunaleikkonan og leikstjórinn Jodie Foster var einnig á meðal gesta, en stórleikkonan Julia Roberts er auk þess sögð hafa verið á gestalistanum.

Brúðkaupið vakti mikla athygli í sænskum fjölmiðlum, og þótti mörgum mikið til koma að skötuhjúin skyldu láta pússa sig saman í Svíþjóð.

Líkt og fram kemur í frétt VG Nyheter er það þó ekki svo galið, enda hefur Heinz verið búsettur í Svíþjóð í hartnær 20 ár þangað sem hann flutti að námi loknu. Þá starfar María við Karólínska háskólasjúkrahúsið í Stokkhólmi.

Myndir úr brúðkaupinu má sjá á vefsíðu Aftonbladet.

Óskarsverðlaunahafinn Jodie Foster var á meðal gesta. Ljósmynd / skjáskot Aftonbladet

• Blogga um frétt