Helstu tískustraumar ársins 2014

Hérna rennum við yfir helstu tískustrauma ársins sem er að líða. Það kenndi ýmissa grasa í tískuheiminum árið 2014 en þessir straumar réðu ríkjum. 

Hvítar flíkur: Hvítur er klárlega „litur“ ársins 2014. Hvítar buxur, hvítir jakkar, hvítar skyrtur, hvítar peysur, hvítar kápur og svona mætti lengi telja áfram. Hvítur alklæðnaður virtist svo vera það allra flottasta.

Kápur: Kápur og aftur kápur. Bæði þykkar og þunnar og í öllum regnbogans litum. Allar helstu tískuskvísurnar keyptu nokkrar kápur til skiptanna þetta árið og létu þær svo hanga á öxlunum.

Mínimal: Minna er meira. Svart, hvítt og grátt voru vinsælir litir þetta ár. Einföld og bein snið og flíkur sem falla undir „normcore“ hugtakið þóttu smart þetta árið. Sömuleiðis var mínimalískt skart vinsælt.

Íþróttaföt: Íþróttaföt fyrir utan íþróttahúsið þótti afar svöl þetta árið. Hvítir Nike-strigaskór við fína dragt var algjörlega gjaldgengt í sumar. Svo kom Alexander Wang með nýja línu fyrir H&M í lok árs sem gaf grænt ljós á íþróttafötin út næsta ár.

Bert á milli: Þá erum við ekki að tala um beran maga heldur bert miðrif. Þessir örfáu sentímetrar gera gæfumuninn, það veit Kim Kardashian sem rokkaði þetta „tískutrend reglulega.

Matvörur: Rándýrar töskur í dulargerfi matarumbúða. Hverjum hefði dottið í hug að Chanel myndi slá í gegn með tösku sem lítur út eins og mjólkurferna.

Stutt hár: Síða hárið fékk að víkja fyrir því stutta. Bob- og lobklippingar (long bob) náðu hvað mestum vinsældum á árinu sem er að líða.

Brúnir varalitir: 90‘s stíllinn kom sterkur inn í förðunartískuna þetta árið. Mattir varalitir í brúnum tónum voru afar áberandi, sérstaklega í lok árs.

Nefhringir: Fyrir árið 2012 boðaði tískuhús Givenchy komu nefhringja og síðan þá hafa allir tískubloggarar og mamma þeirra fengið sér hring í miðsnesið. Þetta „trend“ náði hámarki á þessu ári.