Kjóllinn sem fékk fólk til að taka andköf

Árið 1986 mætti söngkonan Cher í umdeildum kjól á Óskarsverðlaunahátíðina. Kjóllinn, sem var úr smiðju hönnuðarins Bob Mackie, fékk fólk til að taka andköf enda var hann ólíkur öllum öðrum kjólum á þeim tíma. Derek Blasberg, blaðamaður V magazine, tók Bob Mackie tali á dögunum og spurði hann meðal annars út í kjólinn fræga.

Hinn 74 ára Mackie er hokinn af reynslu en hann hefur unnið með stjörnum á borð við Lizu Minnelli, Barböru Streisand og Diönu Ross. En eitt af hans þekktustu verkum er pallíettu-kjóllinn, ef kjól má kalla, sem Cher klæddist á Óskarnum árið 1986.

„Þetta kemur reglulega upp. Öllum var mjög brugðið á þessum tíma. Fólk fylltist ógeði. Þau sögðu: „Þetta er ekki tíska.“ Auðvitað er þetta ekki tíska. Þetta er búningur sem átti að vekja athygli. Og það virkaði. Þetta var á öllum forsíðum næsta dag. Cher vildi hvort sem er aldrei líta út eins og venjuleg kona. Hún sagði við mig: „Ég vil ekki líta út eins og húsmóðir.““

Mackie segir Cher hafa búið yfir nægu sjálfstrausti til að klæðast hönnun hans. „Öll þessi athygli truflaði hana ekki. Margar ungar leikkonur í dag eru óöruggar.“

Mackie segir nútímaleikkonur fá tískuföt gefins í dag og þess vegna eiga þær erfitt með að tjá sinn eigin stíl með klæðaburði. Þess vegna er hann nánast hættur að hanna föt á stjörnurnar.

Cher hefur alltaf verið ögrandi í klæðaburði. AFP

Kjóll Bob Mackie vakti athygli á sínum tíma.

• Blogga um frétt