Svala Björgvinsdóttir er þekkt fyrir að vekja athygli fyrir að fara sínar eigin leiðir þegar kemur að fatavali og sker hún sig jafnan út úr fjöldanum. Hún hefur verið dugleg að að klæðast íslenskri hönnun við undirbúning Eurovision.
Um helgina gekk hún rauða dregilinn í Kænugarði ásamt öðrum keppendum í söngvakeppninni í samfestingi frá íslenska merkinu ANOTHER CREATION. Á samfestingnum er áfast pils sem hægt er að leika sér með.
Í síðustu viku var hún í skemmtilegum fötum sem Hrafnhildur Arnardóttir hannaði undir nafninu Shoplifter fyrir búðina & Other Stories. En það voru víst fleiri Eurovision-keppendur sem féllu fyrir hönnun Hrafnhildar og mætti danski keppandinn í sama jakka og Svala.
Svala var töffaraleg í velúrfötum frá Made by SHE á lokasprettinum.
Svala gerði myndband við lagið sitt Paper og fór það ekki framhjá nokkrum manni að hún var klædd í stóra dúnúlpu frá íslenska fatamerkinu 66°norður.