Harry Bretaprins og Meghan Markle brugðu undir sig betri fætinum á dögunum þegar þau skelltu sér saman opnunarhátíð Invictus-leikanna í Toronto.
Frétt mbl.is: (Næstum) saman í opinberri heimsókn
Skötuhjúin fengu þó ekki að sitja saman en Harry sat í stúku hjá forsetafrú Bandaríkjanna og forsætisráðherra Kanada, meðal annarra. Markle var hins vegar holað niður í áhorfendaskaranum.
Leikkonan virðist þó ekki hafa látið það á sig fá, heldur virðist hún hafa skemmt sér konunglega. Klæðnaður hennar var heldur ekki af verri endanum, en hún skartaði forláta plómulituðum kjól frá Aritzia. Við kjólinn klæddist hún samlitum leðurjakka frá Mackage.
Að sjálfsögðu seldust bæði kjóllinn og jakkinn upp á svipstundu, eins og sjá má í frétt Telegraph, enda Markle mikil tískufyrirmynd kvenna um víða veröld.