Skóhönnuðurinn Christian Louboutin fór í samstarf við Disney í tilefni þess að Stjörnustríðsmyndin The Last Jedi verður frumsýnd á næstu dögum. Louboutin hannaði fjögur pör fyrir fjórar kvenpersónur í myndinni.
Persónurnar sem skórnir voru hannaðir fyrir voru Rey leikin af Daisy Ridley, Vice Admiral Amilyn Holdo leikin af Lauru Dern, Captain Phasma leikin af Gwendoline Christie og Rose Tico leikin af Kelly Marie Tran. Louboutin hannaði skóna eftir persónunum en líka með leikkonurnar í huga.
Louboutin segir að Disney sé mjög gott í að þróa persónur og það sama á sér stað þegar hann hannar skó. „Ég hugsa oft um persónur, þannig á vissan hátt fyrir mig þá er þetta algjörlega eðlilegt að vinna í kringum persónur, það er í raun það sem ég geri,“ sagði Louboutin en rauði sólinn hans fær að halda sér á skópörunum.
Eftir að myndin verður frumsýnd verðar skórnir með áritun Louboutin og leikkvennanna boðnir upp og fer ágóðinn til barna sem þurfa að dvelja á spítölum.
Þetta er ekki í fyrsta skipti sem Louboutin vinnur með Disney en hann hannaði líka skó í tilefni af kvikmynd um Öskubusku og myndinni Maleficent með Angelinu Jolie í aðalhlutverki.