Fylkismenn fengu í dag mikinn liðsauka fyrir keppnina í Pepsi-deild karla í fótboltanum í sumar þegar varnarmennirnir Kristján Hauksson og Agnar Bragi Magnússon sömdu við Árbæjarfélagið.
Kristján hefur verið fyrirliði Fram undanfarin ár og á einnig að baki eitt tímabil með Fjölni í efstu deild. Hann er 27 ára og hefur spilað 128 leiki í úrvalsdeildinni. Framarar tilkynntu óvænt fyrir nokkrum vikum að þeir myndu ekki semja á ný við Kristján.
Agnar Bragi er 26 ára gamall, uppalinn Fylkismaður, en hefur spilað með Selfyssingum síðustu árin og lék 23 leiki með þeim í efstu deild 2010 og 2012. Áður hafði hann spilað einn leik með Fylkismönnum í deildinni.