Ólafur Karl Finsen, knattspyrnumaður úr Íslandsmeistaraliði Stjörnunnar, æfði í gær með norska úrvalsdeildarliðinu Haugesund en hann verður til reynslu hjá liðinu út vikuna eins og komið hefur fram.
Ólafur Karl segist í samtali við Haugesunds Avis kunna vel við sig hjá Stjörnunni og vera síður en svo örvæntingarfullur hvað það varði að komast aftur út í atvinnumennsku, en hann hafi þó vissulega áhuga á því. Samningur Ólafs við Stjörnuna er hins vegar til þriggja ára í viðbót og segir norska blaðið að hugsanlega sé hann því of dýr fyrir Haugesund, sem varð í 11. sæti í úrvalsdeildinni í fyrra.
„Hann lofar góðu. Hann er í góðu formi og sýndi góða tækni á æfingunni. Við sjáum til hvað verður,“ sagði Mark Dempsey, aðstoðarþjálfari Haugesund, í gær.