Leikmenn íslenska karlalandsliðsins í knattspyrnu eiga á hættu að missa af fyrsta leiknum í sögu liðsins í lokakeppni stórmóts, fái þeir rautt spjald í leiknum við Tyrki í kvöld.
Ítalski dómarinn Gianluca Rocchi mun dæma leikinn og fari svo að hann reki íslenskan leikmann af velli, tekur viðkomandi leikmaður út leikbann í fyrsta leiknum á EM í Frakklandi næsta sumar.
Almennt gildir að við þriðju áminningu í undankeppninni fari leikmenn í eins leiks bann, en þessi regla gildir ekki fram í lokakeppnina. Það skiptir því ekki máli þó að Kolbeinn Sigþórsson, Ragnar Sigurðsson eða Ari Freyr Skúlason fái sitt þriðja gula spjald í undankeppninni í kvöld.
Enginn leikmanna íslenska eða tyrkneska liðsins er í leikbanni í kvöld.