Ólafur Þór Guðbjörnsson, þjálfari Stjörnunnar, var hinn kátasti eftir að lið hans hafði unnið góðan 2:1-sigur á Þór/KA í kvöld. Lið hans varð fyrir skakkaföllum í byrjun leiks þegar tveir leikmenn þurftu að fara af velli vegna meiðsla.
„Önnur meiddist í kálfa og hin aftan í læri. Það verður einhver tími sem fer í að það jafni sig. Við eigum samt eftir að skoða þetta betur á morgun. Það er búið að vera mikil törn hjá okkur núna og hún hefur reynst okkur dýr. Við erum með nokkra meidda leikmenn og tvær á bekknum í kvöld voru aldrei að fara að spila, voru bara til skrauts,“ sagði Ólafur Þór um ástæðu tveggja skiptinga sinna í fyrri hálfleik.
„Leikurinn fannst mér þrælskemmtilegur. Það var mikið um færi og barátta allan tímann við erfiðar vallaraðstæður. Við vorum nokkuð heppin, björguðum á línu og svo kom bara Harpa og kláraði þetta. Hún er alveg ótrúleg og gott að hafa hana inná þarna í lokin. Ég lét hana taka aukaspyrnurnar, bara til að prófa eitthvað nýtt. Hún er með öflugan fót og það kom stundum stórhætta upp úr þessum löngu spyrnum,“ sagði Ólafur Þór enn fremur.