Knattspyrnudeild KR hefur gert samkomulag við Hólmfríði Magnúsdóttur um að leika með félaginu næstu tvö árin en þetta kemur fram á heimasíðu félagsins í dag. Hún kemur frá norska liðinu Avaldsnes.
Hólmfríður, sem er Rangæingur, lék upp yngri flokka með strákunum í KFR, en flutti svo til Reykjavíkur og lék með KR. Hún lék 129 leiki fyrir meistaraflokk félagsins frá 2000 til 2008 og skoraði 109 mörk.
Hún hefur leikið síðustu ár í atvinnumennsku en hún hefur leikið með félögum á borð við Fortuna Hjörring, Kristianstad, Philadelphia Independence og þá hefur hún leikið með norska stórliðinu Avaldsnes síðustu fimm tímabil.
Hún er nú komin aftur í KR en hún gerir tveggja ára samning við félagið. Þetta er mikill hvalreki fyrir félagið sem hefur styrkt sig vel síðustu vikur. Þórunn Helga Jónsdóttir og Katrín Ómarsdóttir sömdu við félagið á dögunum og því ljóst að KR ætlar sér stóra hluti næsta sumar.
Hólmfríður á 110 landsleiki að baki með íslenska landsliðinu og hefur gert 37 mörk í þeim.